【瑜伽班入門篇】5大瑜伽分類+學瑜伽去邊度學好？

1.哈達瑜伽（HathaYoga）—古典瑜伽

哈達瑜伽可以話係大部分瑜伽派別嘅統稱，較著重體位法練習，練習瑜伽動作時要配合呼吸調息，令身體放鬆，保持身心寧靜，所以有時課堂內容會包括呼吸練習同冥想。哈達瑜伽節奏較慢，適合瑜伽入門。

2.阿斯坦加瑜伽（AshtangaYoga）—高強度瑜伽

阿斯坦加瑜伽係一種古老嘅瑜伽系統，主要分為6級，毎級都有一連串嘅動作，毎次要按指定次序練習，成套瑜伽動作練晒要1-2小時。阿斯坦加瑜伽強調動作同呼吸嘅配合，主要鍛練身體嘅力量、柔韌性同耐力，對練習者嘅體能素質要求較高。

 3.Vinyasa瑜伽/流瑜伽（FlowYoga）—瑜伽動作流暢銜接

Vinyasa係梵語，意指呼吸同動作同步，即係練習者每次吸氣或呼氣時，由一個動作轉換到另一動作，所以又有人稱之為「流瑜伽」（FlowYoga）。由於對體位嘅序列冇阿斯坦加瑜伽咁嚴格，所以相對冇咁難。

4.空中瑜伽（AerialYoga）—釋放脊椎壓力

空中瑜伽運用懸吊嘅布帶或吊床，於半空中做瑜伽動作。由於有布帶作承托，所以就算係筋骨僵硬嘅初學者，都可輕易做出各種於平地做唔到嘅伸展動作，而大量倒吊動作亦有助促進血液循環，紓緩脊椎問題。

5.高溫瑜伽（HotYoga）—瑜伽減肥必學

高溫瑜伽又稱為「熱瑜伽」，係指喺約38℃–40℃嘅高溫環境中做瑜伽，利用熱能令你大量出汗，從而排走體內毒素。由於喺高溫環境下人嘅身體柔韌度會變好，所以更易伸展身體，冇咁易拉傷，好適合初學者，但如果患有高血壓、心臟病、糖尿病等疾病嘅人就唔太適合。

1.自學

依家想自學瑜伽其實好簡單，可以透過YouTube同手機App（譬如「每日瑜伽DailyYoga」）自學，完全免費，只要有時間就可以自己喺屋企練習。不過，瑜伽有唔少高難度動作，如果冇導師嘅指導，其實好難靠自己完成到動作。如果做錯咗仲好容易搞到肌腱受傷，或者拉傷韌帶添！長遠嚟講都係搵番嘅專業嘅瑜伽導師指導比較穩陣！

2.工聯會／康文署

康文署和工聯會都有平價瑜珈課程，價錢經濟實惠，平均每堂約$70，平價瑜伽之選！而且上課時間同地點都有好多選擇，相當方便。不過，康文署和工聯會通常係大班教學，瑜伽導師未必能照顧唔同學生嘅需要，而且瑜伽教練質素良莠不齊。如果你只係初學者想試玩瑜伽，咁工聯會課程就不失為便宜嘅選擇。但亦因為價錢平，報名人數多，未必咁易報到適合你的時間和地區。

3.瑜伽中心

香港有唔少大型瑜伽中心，設備完善（譬如有淋浴間，落堂後可以沖埋涼），又有多種瑜伽課，部分機構更會提供瑜伽試堂。由於呢類瑜伽大多提供月繳或預繳形式嘅課程，即係你可能要一次過分要交半年甚至全年嘅學費，報名前最好衡量風險。

4.私人瑜伽班

呢類小型瑜伽班、私人瑜伽班喺時間同地點上都較少選擇，場地設備亦較大型中心輸蝕。不過喺大型瑜伽中心上堂通常都係大班教學，有時你只能跟住瑜伽導師嘅動作做，但唔知自己做得啱唔啱。如果係私人、小型瑜伽班，瑜伽老師就會有更多時間作詳細指導，糾正同學嘅動作。