【語言課程】10大自學外語網站推介

你可以透過italki尋找語言夥伴（超過50種語言），成功加為好友後就能夠同佢哋交流。網站亦設有作文簿同問答版，你可以提交問題同作文，等其他母語者幫你解答同修改。你仲可以俾錢上italki語言教師嘅課堂。導師毎小時收費因人而異，但你要先用信用卡、Paypal或支付寶等購買italki信用點數，再用點數購買課程（不過要留意番毎次都有手續費）。

網站：https://www.italki.com

BBC嘅語言學習網站設有德文、希臘文同中文等33種語言嘅學習資源，毋須事前登記做會員，有視頻、錄音同詞彙庫等，適合初學者使用。抵讚嘅係BBC仲提供埋外語新聞同廣播連結，方便用戶查閱。

網站：http://www.bbc.co.uk/languages/

Lang 8同italki一樣，係聚集咗唔同母語嘅人語言交流，你可以用你正在學習嘅語言寫作，由母語者幫你修改文章，同時你亦可以幫其他用戶改文，賺取點數。點數愈高，你嘅排名就愈高，你嘅文就會有更多人睇到。

網站：http://lang-8.com/

Babbel提供14種語言嘅自學課程，主要是印歐語言如西班牙語、丹麥語同印尼語等。你可以按個人水平同喜好選擇唔同程度嘅內容自學，除咗詞彙同句子外，仲有聆聽同口語嘅單元。不過網站只有初學者課程內容係免費，如果想進一步學習更多就要付款購買課程，費用為每個月US$6 – $12左右。

網站：https://www.babbel.com/

Transparent Language提供超過100種語言課程，可以話係以上網站中規模最大嘅。如果你想學習較冷門語言如峇里語、烏爾都語、塞爾維亞語等，呢個網站都可以提供相關嘅學習資源，包括聽寫讀講練習、文法同打字教學等。不過網站只提供14日免費試用服務，之後仲想繼續嘅話就要支付US$16 – $30不等嘅月費購買課程。

網站：http://www.transparent.com/

Duolingo最特別嘅地方就係喺課程中加入遊戲關卡，令學習過程更有趣。如果你用中文版面，暫時淨係可以揀學英文同西班牙語，但如果用英文版面就可以使用超過20種語言課程。費用全免，而且幫你記錄埋學習進度，十分方便。

網站：https://www.duolingo.com/

Learn a Language提供超過20種語言嘅學習資源，包括詞彙、常用句子、文化知識同讀音嘅音頻，費用全免。無論你係剛入門嘅初學者定係進階用戶，都可以搵到有用嘅資料。

網站：http://www.learnalanguage.com/

顧名思義，My Language Exchange係俾唔同母語嘅人進行交流嘅學習平台。你可以尋找其他語言嘅朋友，通過Email成為筆友，又或者透過文字或語音聊天練習寫作同會話。呢個網址同樣費用全免。

網站：https://www.mylanguageexchange.com/

Mango Languages提供超過70種語言課程，連美國手語、普午圖語同烏戡別克語等較冷門嘅語言都有。你只要下載app就可以免費使用任何語言課程嘅第一堂，其餘課程收費為每個月US$20。如果你身在北美，記得查下附近圖書館有冇訂閱Mango Languages資源，有就可以免費使用。

Busuu係另一個大型嘅語言學習平台，用戶超過6,000萬人，提供法文、葡萄牙文同俄文等12種語言課程。網站標榜會員用Busuu VIP功能學習22小時後就等同喺大學學語言整整一個學期。會員可以免費檢視部分課程內容，但想再深入學習，就要先付款成為VIP會員，至可以使用旅遊課程、對話練習、語法練習等學習資源。

網站：https://www.busuu.com/