【Hellotoby嚴選推介】 2018年 三大 創新聖誕裝飾

做咗咁多年人，相信你可能覺得普通嘅商場聖誕燈飾同佈置已經滿足唔到你：聖誕老人、聖誕樹、鹿、禮物盒（仲要其實係空嘅）……

但喺2018年，香港有好多商場都有別出心裁嘅另類聖誕裝飾，相信一定能夠令你重拾欣賞商場聖誕裝飾嘅興趣！今個聖誕，Hellotoby為你嚴選香港三大創新商場聖誕裝飾！

第 3 位：美麗華商場

利申咗先，呢個係對美麗華商場嘅直線讚美嚟。男嘅可以睇靚女DJ，女嘅可以睇肌肉型男，為本身凍冰冰嘅聖誕節升溫唔少！

美麗華呢個 OMG! Santa is HOT 主題令大家可以大飽眼福之餘，仲成功顛覆大家對聖誕節嘅既有印象：唔洗著咁厚，都可以有個火辣嘅節慶Party！所以絕對值得一去。

第2位：屯門時代廣場

所謂「綠帽唔怕戴，最緊要除得快」，但係呢位身處屯門時代廣場「色廊展」嘅聖誕老人真係唔話得，戴住頂綠帽唔除都算，仲任人同佢打卡，非常敬業樂業！Off topic，認真講句，「色廊展」呢個名都算夠哂gimmick！

（圖片來源：連登討論區）

第1位：天一商城

呢個絕對夠哂經典，我都唔知可以點形容。大家唔難睇得出天一商城用心良苦，透過反面教材，聖誕節都要勸導香港人要珍惜生命，真係抵佢榮登第 1 位！

好喇，睇完咁多咁有創意嘅聖誕裝飾，不如睇返一啲外國嘅傳統聖誕燈飾回下血？以下係日本嘅聖誕商場佈置同街景。